Դուրղուտին հիշում է շրջափակումը,
հիշատակման միջոցառում
Հունաստանի հայերի միությունը՝ «Պիղասոս» հունական կազմակերպության հետ համատեղ և Աթենքի քաղաքապետարանի աջակցությամբ սեպտեմբեր 27-ին կազմակերպել է միջոցառում՝ նվիրված Երկրորդ համաշխարհային պատերազմի տարիներին Աթենքի Դուրղուտի թաղամասում նացիստական բռնություններին զոհ դարձած ազատամարտիկներին և անմեղ քաղաքացիներին, այդ թվում՝ բազմաթիվ հայերի:
«Դուրղուտին հիշում է շրջափակումը» վերնագրված միջոցառումը մեկնարկեց ծաղկեպսակների զետեղմամբ Դուրղուտիի շրջափակման հուշարձանին, որին իրենց մասնակցությունն ունեցան Հունաստանի պետական, քաղաքական և համայնքային շրջանակների ներկայացուցիչներ։ Հուշարձանին ծաղկեպսակ զետեղեցին նաև Հունաստանում ՀՀ դեսպան պարոն Տիգրան Մկրտչյանը, Աթենքի քաղաքապետարանի և Ատտիկայի շրջանի ղեկավարության ներկայացուցիչները, ինչպես նաև Հունաստանի խորհրդարանի տարբեր քաղաքական ուժերի պատգամավորներ։
Միջոցառմանը՝ որին ներկա էր նաև Հունահայոց թեմի առաջնորդ Տեր Խորեն եպիսկոպոս Առաքելյանը, ներկայացվեց մշակութային հարուստ ծրագիր՝ հայ և հույն արվեստագետների մասնակցությամբ։ Հանդես եկան «ԱՎԵՏԻՍ» հայկական ժողովրդական պարախումբը և Մկրտիչ Պողոսյանի ժողովրդական երաժշտական խումբը, որոնք իրենց բեմական ներկայացումներով ընդգծեցին հայ և հույն ժողովուրդների պատմական կապերը, ազատության համար մղված պայքարի միասնական ոգին և հիշողության պահպանման կարևորությունը։
Հունաստանի Հայերի Միությունը հատուկ կարևորում է հայ համայնքի ներկայությունն ու ակտիվ մասնակցությունը նման միջոցառումներում՝ որոնք հանդիսանում են միջհամայնքային համերաշխության և հայ-հունական բարեկամության ամրապնդման կարևոր երաշխիք։
Այս միջոցառումը վկայում է, որ Դուրղուտիի հիշողությունը շարունակում է կենդանի մնալ և սերնդեսերունդ փոխանցել ազատության, դիմադրության և միասնության արժեքները։
Հունաստանի Հայերի Միություն
Աթենք, սեպտեմբեր 27, 2025թ․