Հարգանքի տուրք Եռաբլուրում
Այսօր՝ օգոստոսի 7-ին, Հայ նորագույն ազգային ազատագրական պայքարի նահատակների օրվա առիթով Հայկական ժողովրդային շարժումի Երևանի գրասենյակի նախաձեռնությամբ՝ Եռաբլուր պանթեոնում հարգանքի տուրք է մատուցվել ԱՍԱԼԱ-ի և Նորագույն ազատագրական պայքարի բոլոր նահատակների հիշատակին:
Եռաբլուրի ԱՍԱԼԱ-ի հուշահամալիրի տարածքում կատարվել է հոգեհանգստյան հատուկ կարգ, հանդիսապետությամբ Սբ. Էջմիածնի երիցագույն հոգևորական Տ. Ոսկան Արքեպիսկոպոս Գալփակյանի:
Սրբազանը խոսեց 7 օգոստոսի պատգամի մասին, Նորագույն ազգային ազառագրական պայքարով Սփյուռքից՝ Հայաստան հայ ժողովրդի ապրած զարթոնքի և ոգևորության, նահատակների նվիրումի և զոհողության գնով հայության նվաճած քաղաքական արդյունքների մասին, և պայքարի թողած ազդեցությունը Հայոց պետականության կայացման վրա:
Օգոստոսի 7-ի հանդիսությանը ներկա էին պատանի և երիտասարդ հայրենապաշտպան կամավորներ, ովքեր եկել էին հարգելու իրենց երեցների նվիրումն ու զոհողությունը:
Հիշատակի հանդիսությանը ներկա էին նաև Նորագույն ազատագրական պայքարին մասնակցած նախկին քաղբանտարկյալներ, նահատակների ընտանիքներ, հարազատներ և երկրպագուներ:
